ЦХИНВАЛ, 24 сен — Sputnik, Плиты Фатимæ. Хуссар Ирыстоны дзулфыцæн комбинат Республикæйы бæрæгбонмæ сцæттæ кодта æнахуыр дынджыр уæлибых — йæ диаметр уыд 112 сантиметры, фехъусын кодта Sputnik амалиуæгады хистæр Цхуырбаты Вадим.
"Сфæлвæрдтам азы райдайæны нæ ног пец æмæ дзы скодтам уæлибых. Республикæйы бæрæгбонмæ дæр сфæнд кодтам сфыцын егъау хæбизджын – йæ диаметр рацыд 112 сантиметры, фæлæ нын рекордты чиныгмæ хаст не ʻрцыд", — загъта Цхуырбаты Вадим.
Официалон æгъдауæй Уæрæсейы рекордты чиныджы фыст æрцыд Цхинвалы дзулфыцæн комбинаты конд уæлибых 84 см диаметры бæрц, кæцы скодтой 2009 азы Республикæйы бонмæ. Уый фæстæ Дзæуджыхъæуы базарадон-экономикон техникумы скодтой стырдæр уæлибых (диаметр 105 см), фæлæ йæ рекордты чиныджы не сфидар кодтой.