ЦХИНВАЛ, 25 сен — Sputnik. Хуссар Ирыстоны Дзауы районы мидхъуыддӕгты хайады кусджытӕ Гуфтайы хъӕуы посты Mercedes хӕдтулгӕйы басгӕрсты рӕстӕджы ссардтой тобӕгонд буарады фондз капсул. Цау ӕрцыд дысон ӕхсӕвы, хъусын кӕны республикӕйы Мидхъуыддӕгты министрады (МХМ) пресс-службӕ.
"Басгӕрсты рӕстӕджы пассажиртӕй иумӕ, Цхинвалы районы Тбеты хъӕуы 33-аздзыд цӕрӕгмӕ ссардтой ӕмӕ байстой тобӕгонд буарады фондз капсул, кӕцы уыд хосгӕнӕн буарад "Лирика", — дзырдӕуы уагдоны хъусинаджы.
Басгӕрст уадзы Дзауы районы мидхъуыддӕгты хайад.
Амӕйразмӕ Хуссар Ирыстоны парламент райста закон административон ӕмӕ уголовон бӕрны фӕдыл медицинон буарад "Лирика"-йы парахат кӕныны тыххӕй.