ЦХИНВАЛ, 3 окт — Sputnik, Уалыты Диана. Бӕрӕгбонон концерт "Цард ӕнӕ цӕлхдуртӕй" ацыд ӕртыццӕджы Хуссар Ирыстоны столицӕйы. Пионерон парчы ӕрӕмбырд сты республикӕйы цӕрджытӕ, цӕмӕй байхъусой сӕ уарзон зарджытӕм ӕмӕ балӕууой инвалидты фарсмӕ. Парчы рестораны верандӕйыл ралӕууыдысты ирон музыканттӕ ӕмӕ къордтӕ, афтӕ ма адӕмон инструментты паддзахадон ансамбль "Айзӕлд".
Бӕрӕгбоны организатор, парламенты депутат ӕмӕ Уӕрӕсейы адӕмы ассамблейы минӕвар Хуссар Ирыстоны Коцты Жанна банысан кодта, мадзалы нысан кӕй уыд инвалидты проблемӕтӕм хъусдард ӕрбаздӕхын.
"Абоны бон бирӕ арӕзт цӕуы, сӕйраджыдӕр, нӕ президентӕй ацы категорийы ӕмбӕстӕгты ӕххуысӕн. Ӕлхӕд цӕуынц къаласкӕтӕ, аразынц пандустӕ бирӕуӕладзыгон хӕдзӕртты, цы ран цӕрынц инвалидтӕ, афтӕ ма сын аразынц сӕрмагонд хоскӕнын. Фӕлӕ уӕддӕр инвалидты ӕххуысӕн хъӕуы саразын комплексон паддзахадон программӕ", — загъта депутат.
Коцты Жанна бафтыдта, зӕгъгӕ, мадзал хъуамӕ суа ӕрвылазон традици.
Афтӕ ма мадзалы хайад райстой Лондоны параолимпиаг хъӕзтыты уӕрӕсейаг чемпионтӕ, рог атлетикӕ, футбол, армрестлинг, уӕлыстол теннис ӕмӕ паратхэквондойы спортсментӕ.
Фӕстагмӕ Коцты Жанна загъта бузныг мадзал саразыны тыххӕй ресторан "Vincenzo" ӕмӕ Хуссар Ирыстоны Национ банкӕн.