ЦХИНВАЛ, 3 окт — Sputnik, Плиты Фатимæ. Уæрæсейы сæйраг тренер уæгъдибар хъæбысхæстæй Тедеты Дзамболат фехъусын кодта бæстæйы æмбырдгонды сконд дунейы чемпионатмæ. Уæрæсейы тырысайы бын архайдзысты 10 богалы, се хсæн дыууæ ироны, хъусын кæны Уæрæсейы спортивон хъæбысхæсты сайт.
Дунейон ерыстæ райдайдзысты 20 октябры Будапешты. Уæрæсейы спортивон кад хъахъхъæндзысты 2018 азы бæстæйы чемпионаты уæлахиздзаутæ Сидахъты Зауыр (74 кг) æмæ Цæкулаты Батырбег (92кг).
"Абон райсомæй Уæрæсейы сæйраг тренер уæгъдибар хъæбысхæстæй Тедеты Дзамболат фехъусын кодта командæйы сконд дунейы чемпионатмæ. Ӕнæнхъæлæджы уынаффæ дзы нæ разынд – æмбырдгонды скондмæ бацыдысты Уæрæсейы фараст чемпионы æмæ Гаджимурад Рашидов, кæцы расгуыхт "Мемориал Циолковского"-йы", — дзырдæуы хъусинаджы.
Уæрæсейы командæйы капитан у олимпиаг чемпион Абдулрашид Садулаев. Командæйы сконды ма хицæн уæзы категориты архайдзæн: Заур Угуев, Ахмед Чакаев, Магомедрасул Газимагомедов, Ахмед Гаджимагомедов, Даурен Куруглиев, Анзор Хизриев.