ЦХИНВАЛ, 8 окт — Sputnik, Плиты Фатимæ. Хуссар Ирыстоны уæззау атлетикæйы скъолайы хъомылгæнинаг Икъаты Сæрмæт стох кæндзæн Екатеринбургы Европæйы чемпионаты, фехъусын кодта Sputnik штангисты тренер Плиты Артур.
"Ерыстæ цæудзысты 20-21 октябры. Нæ хъомылгæнинаг тох кæндзæн 125 кг категорийы. Развæлгъау ныфсытæ æвæрын мæм раст нæ кæсы, фæлæ цæуы хорз цæттæйæ æмæ йын æнхъæлмæ кæсæм йе 'нтыстытæм", — загъта Плиты Артур.
Икъаты Сæрмæтыл цæуы 21 азы, 18 азæй фæстӕмæ рамбылдта 40 фыццаг бынаты хицæн æмвæзады ерысты. Цхинвалы спортсмены цæттæ кæнынц уæззау атлетикæйы скъолайы тренертæ Плиты Артур æмæ Габаты Ацæмæз. Скъолайæн разамынад дæтты Советон Гуырдзыстоны бирæ хатты чемпион, æхсæнадæмон классы спорты мастер уæззау атлетикæйæ Тасойты Олег.