ЦХИНВАЛ, 15 окт — Sputnik, Плиты Фатимæ. Дзауы районы уæгъдибар хъæбысхæсты скъолайы самбойы секцийы хъомылгæнинæгтæй дыууæ ссисты Ӕппæтуæрæсейон культурон-спортивон фестивалы призертæ, фехъусын кодта Sputnik спортсменты тренер Беджызаты Гия.
Культурон-спортивон мадзалы архайдтой 8 – 16 азы кары спортсментæ спорты дæс хуызæй — æмбуар хæст, самбо, кикбоксинг, джиу-джитсу, сито-рю, киокусинкай æмæ æндæр дисциплинæтæй.
"Къозонты Арсен æмæ Беджызаты Арсен — дыууæ дæр схызтысты пьедесталы æртыккаг къæпхæнмæ. Фыццаг ссис æртыккаг призер 72 кг уæзы, дыккаг та 60 кг уæзы. Дыууæ дæр фæхæрд сты финалмæ ахизыны тохты. Бæргæ хъуамæ уыдаиккой финалы, фæлæ нæ тæрхонгæнджытæй дæр амонд нæ фæцис, сæ уынаффæ бынтон раст нæ уыд æмæ уый хыгъд лæппутæ райстой æрмæст æртыккаг бынæттæ", — загъта тренер.
Фестиваль сарæзтой Уæрæсе æмæ Цæгат Ирыстоны спорты министрадтæ олимпиаг комитет æмæ Уæрæсейы æфсæддон æмтохæдты æххуысæй.