ЦХИНВАЛ, 7 ноя — Sputnik, Плиты Фатимæ. Хуыбылты Валерийы номыл Стыр парчы рæвдауæндон "Булæмæргъ"-мæ хæстæг сагъд æхсæз бæласы ссисты хъаугъайаг сабидоны коллектив, ныййарджытæ æмæ горæты сæйраг декораторы хсæн. Иутæ домынц сæ ракалын, аннæтæ сты уый ныхмæ.
Ныридæгæн Леуахийы былыл Стыр парчы цæуынц хæрзарæзтадон куыстытæ. Фæзуат цæуы сыгъдæг, калынц зæронд бæлæсты, кæцытæн у тас фæлдæхынæй. Сабидонмæ хæстæг æхсæз бæласы ракалын домынц коллектив, фæлæ аразджытæ домæн не ʻххæст кæнынц, горæты сæйраг декоратор Къæбулты Зауыры фæдзæхст æххæстгæнгæйæ.
Рæвдауæндон "Булæмæргъ"-ы хистæр Ӕлборты Ирина радзырдта Sputnik, зæгъгæ, парчы цы аразджытæ кусынц, уыдон фидарæй дзурынц, бæлæсты уидæгтæ кæй сты æмбыд.
"Стæй парчы ракалдтой бирæ бæлас æмæ иннæтыл ныр дымгæйы тых тынгдæр цæуы. Дыууæ азы размæ дзы иу бæлас рафæлдæхт, кæрты фæцæйцыд сывæллон йæ фыдимæ, æмæ æрмæстдæр Хуыцауы фæрцы аирвæзтысты. Мах нымайæм, æнæмæнг сæ хъæуы ракалын. Иугæр парк аразынц, уæд дзы уадз æмæ ныссадзой ног бæлæстæ", — загъта директор.
Уый ма радзырдта, бæлæстæй цалдæр кæй сты бæрзонд гæдыбæлæстæ, дымгæ бон фæцæуы сæ хъыс-хъыс, стæй ма сын тыхсынц сæ пакъуыйæ дæр.
"Ныридæгæн та сывæллæтты 60% тыхсынц аллергийæ", — бафтыдта уый.
Горæты администрацийы хæрзарæзтады управленийы декоратор Къæбулты Зауыры ныхæстæм гæсгæ та бæлæсты фарст нырма кæронмæ скъуыддзаг нæу.
"Бæлæстæн нырма рафæлдæхынæй тас нæу, фæлæ æвзæр нæ уаид, бæлæстæ иууылдæр куы ракаликкой æмæ сæ бынаты æмхуызон талатæ куы ныссадзиккой. Мах ракалдтам, тас цы бынтæ æвзарын кæнынц, уыдон. Горæтæн йæ финансон авналæнтæ куыд сты, уымæ гæсгæ аскъуыддзаг уыдзæн фарст", — загъта уый.
Хуыбылты Валерийы номыл Стыр парк цалцæг фæуыдзæн, арæзтады министрады ныфсытæм гæсгæ, æрбалæугæ азы астæумæ.