ЦХИНВАЛ, 14 ноя — Sputnik, Плиты Фатимæ. Сывӕллӕтты ӕмӕ ӕрыгон фӕсивӕды боксы скъола рабӕрӕг кодта хуыздӕр боксерты 2007-2008 азы гуырд спортсменты ʻхсæн. Ерысты хатдзæгтæм гæсгæ, 12 боксеры раразмæгонд æрцыдысты Дзæуджыхъæуы фыццагадмæ, фæстæдæр æвзæрст рацæудзысты 2003-2004 азы гуырд спортсментæ дæр.
Горæт Дзæуджыхъæуы гом фыццагады ерыстæм балцæгыл тох кодтой 14 къайы. Кæцыдæр чысыл спортсментӕн уый уыд сӕ фыццаг фӕлтӕрддзинад рингыл. Ныхмæлæудтæ ацыдысты Спорты скъолайы боксы секцийы хатæны. Ерысты зал ӕрӕмбырд кодта сӕдӕгай адӕймӕгты – ныййарджытӕ, тренертӕ ӕмӕ чысыл боксерты хӕлӕрттӕ ринг ӕрхъулагӕнгӕйӕ сӕ цӕст дардтой тохтӕм.
"Тохты архайдтой 28 боксеры. Спаррингты фæрцы рабæрæг кодтам тыхджындæр спортсменты, уырны мæ, уыдон иттæг хорз равдисдзысты сæхи цæгатирыстойнаг турниры. Фыццаг хатт нæ архайынц ацы ерысты нæ хъомылгæнинæгтæ æмæ алыхатт дæр равдисынц хорз бæрæггæнæнтæ. Ацы азы командæйы сконды ис Уæрæсейы фыццагады архайæг æмæ бынтон æвæлтæрд спортсментæ дæр", — радзырдта Sputnik боксы скъолайы директор хæдивæг Кокойты Ирбег.
Уый ма бафтыдта, æмткæй Хуссар Ирыстоны командæйы сконды кæй уыдзæн 20 боксеры онг, ныридæгæн æвзæрст цæуы 2003-2004 азы гуырдты ʻхсæн дæр.
"Хуссар Ирыстоны кад ерысты хъахъхъæндзысты Боксы скъола æмæ Спорты галуан "Олимп"-ы хъомылгæнинæгтæ. Кæстæр кары боксертæм æнхъæлмæ кæсы фæйнæ тохы, хистæртæн уыдзæн фылдæр фембæлдтæ. Цæуынц хорз цæттæ лæппутæ мæ хорз хатдзæгтимæ хъуамæ æрæздæхæм", — загъта тренер Дзигойты Ацæмæз.
Дзæуджыхъæуы гом фыццагад боксæй цæудзæн 15-18 ноябры.