ЦХИНВАЛ, 19 ноя — Sputnik, Плиты Фатимæ.Цхинвалы дыккæгæм скъолайы командæ ссис Фыдыбæстæйон хæсты хъайтар Козаты Левы VIII-æм æппæтреспубликон турниры уæлахиздзау мини-футболæй. Хатдзæгон хъазт финалист командæты ʻхсæн ацыд зынгхуст хъайтары райгуырæн боны.
Финалон хъазтыты размæ турниры архайджытæ æмæ организатортæ дидинтæ сæвæрдтой Козаты Левы цыртыл Цхинвалы.
Фыццаг бынатыл тох цыд Цхинвалы дыккæгæм æмæ дыууадæсæм скъолайы командæты ʻхсæн. Турниры тыхджындæрты ʻхсæн фембæлды сæйраг рæстæг ахицæн æмдыхæй, уæлахиздзауы хъысмæт аскъуыддзаг ис пенальтиты руаджы — ам æнтыстджындæр разынд дыккæгæм скъола.
Æртыккаг призеры номыл хъазт цыд æхсæзæм скъола æмæ гимнази "Альбионы" ʻхсæн, дыккæгтæн нæ бантыст басæттын сæ ныхмæлæуджыты, фæлæ райстой зæрдылдарæн лæвар æмæ грамотæтæ.
"Бузныг алкæмæн дæр, чидæриддæр хайад иста турниры. Фыццаг рады уый у мысæн мадзал, хъайтар æмæ футболисты номарæн. Афтæ рауад æмæ уый йæ цард снывонд кодта, цæмæй абон мах цæрæм сæрибар æмæ сабыр Ирыстоны", — загъта скъола футболы директор Битеты Зауыр.
Турниры рæстæджы ма рабæрæг кодтой ерысты хуыздæр хъазджыты. Хуыздæр дуаргæсыл банымадтой Бибылты Андрейы, хуыздæр хъахъхъæнæг ссис Хъуылымбегты Олег, хуыздæр размæбырсæг – Босыкты Дауыт, хуыздæр хъазæг – Дудайты Алан.
Фыдыбæстæйон хæсты хъайтар Козаты Левы номарæн VIII-æм æппæтреспубликон турнир мини-футболæй цыд 4-17 ноябры футболы скъола "Фæранк"-ы фæзуаты.