ЦХИНВАЛ, 27 ноя — Sputnik. Парти "Иугонд Ирыстон" ауагъта Цхинвалы зӕрӕдтӕ ӕмӕ инвалидты хӕдзар "Забота"-йы бӕрӕгбонон концерт, кӕцы уыд нывонд Мады бонӕн, хъусын кӕны Хуссар Ирыстоны парламенты пресс-службӕ.
Музыкантты ралӕуды размӕ концерты организатор, парламенты депутат Уалыты Роза раарфӕ кодта ӕрӕмбырдуӕвджытӕн Мады боны цытӕн ӕмӕ сын йӕ цӕст бауарзта ӕнӕниздзинад.
"Мӕнӕн ӕхсызгон у, абон махӕн фадат кӕй ис балӕвар кӕнын сымахӕн бӕрӕгбоны хай. Мад у адӕймаджы иууыл зынаргъдӕр хӕзна, ӕмӕ йын иу лӕгъз ныхас дӕр бахъарм кӕны йӕ зӕрдӕ. Абон мӕн фӕнды раарфӕ кӕнын сымахӕн ацы диссаджы бӕрӕгбоны цытӕн ӕмӕ уын мӕ цӕст уарзы ӕнӕниздзинад ӕмӕ царды бирӕ ӕзтӕ", — загъта депутат.
Афтӕ ма депутат загъта бузныг алкӕмӕндӕр, чи баххуыс кодта сорганизаци кӕнын ацы мадзал — "Иугонд Ирыстоны" сӕргълӕууӕг Тадтаты Алан ӕмӕ Цхинвалы дзулфыцӕн заводы директор Цхуырбаты Вадимӕн.
Концерты хайад райстой хуссарирыстойнаг артисттӕ Мамиты Григорий, Саппиаты Зӕлинӕ, Кристина Гогинова ӕмӕ Задыты Олеся.
Мадзалы кӕрон Уалыты Роза ӕмӕ партийы минӕвӕрттӕ радтой карджын адӕмӕн зӕрдылдарӕн лӕвӕрттӕ ӕмӕ адджинӕгтӕ.