ЦХИНВАЛ, 4 дек — Sputnik. Хуссар Ирыстоны президент Бибылты Анатолий федта Кӕсойты Лаврентийы куыстытӕ нывгӕнӕджы сӕрмагонд равдыст "Мӕ сабийы бонты горӕт"-ы, хъусын кӕны паддзахады сӕргълӕууӕджы пресс-службӕ.
Хуссар Ирыстоны адӕмон нывгӕнӕджы экспозици байгом ис Цхинвалы Хуссар Ирыстоны паддзахадон университеты 21 ноябры. Амйӕразмӕ, октябры, Кӕсойты Лаврентийы равдыст ацыд Мӕскуыйы, Уӕрӕсейаг аивады музейы.
Паддзахады сӕргълӕууӕг радзырдта равдысты йӕ тӕлмӕнты тыххӕй ӕмӕ банысан кодта, нывгӕнӕджы алкӕцы куыст дӕр кӕй ӕвдисы мастеры фантазитӕ.
"Алкӕцы куысты дӕр нывгӕнӕг равдыста йӕхи интонацитӕ ӕмӕ эмоцитӕ. Иууыл хъармдӕр ын рауадысты нывтӕ, кӕцытӕ баст сты нӕ Фыдыбӕстӕимӕ, диссаг сты зӕронд Цхинвалы нывтӕ. Ӕдзӕрӕг хӕдзӕрттӕ, хъӕутӕ — уыдон иууылдӕр сты истори", — бахахх кодта Бибылты Анатолий.
Президент банысан кодта Кӕсойты Лаврентийы курдиат ӕмӕ йӕ схуыдта гениалон нывгӕнӕг.
Аивады райрӕзтмӕ стыр хайбавӕрды тыххӕй, республикӕйы фӕсивӕды ӕхсӕн националон культурӕ ӕмӕ традициты активон пропагандӕ ӕмӕ йӕ 70 азы юбилейы тыххӕй Кӕсойты Лаврентийы схорзӕхджын кодтой Кады Орденӕй.