ЦХИНВАЛ, 7 дек — Sputnik. Дунейы 15 бæстæйы 200 спортсмены сæ хъарутæ бафæлвардзысты 8-9 декабры Цæгат Ирыстоны уæгъдибар хъæбысхæстæй æппæтадæмон турнир "Алантæ"-йы, хъусын кæны ПТРК "Алания".
Спортсментæ ныридæгæн æрцыдысты Цæгат Ирыстонмæ æмæ тренировкæтæ кæнынц Хæдарцаты Асланы номыл академийы.
"Ныртæккæ спорты галуан "Манеж"-ы цæттæ кæнынц æппæтдунеон 2-аг турнирмæ уæгъдибар хъæбысхæстæй. Гауызтæ, рухс, акустикæ — алцыдæр хъуамæ уа бæрзонд æмвæзадыл. Фарон "Аланты" турнир уыд æнтыстджын æмæ ацы аз дæр дунейы алы бæстæтæй æрбамбырд кодта бирæ адæм", — дзырдæуы хъусинаджы.
Цæгат Ирыстонæй мадзалы архайдзæн 30 спортсмены.
Сабат æмæ хуыцаубоны спортивон галуан "Манеж"-ы Дзæуджыхъæуы цæудзæн дыккаг æппæтадæмон турнир "Алантæ".