ЦХИНВАЛ, 13 дек — Sputnik, Гӕбӕратя Ян. Хуссар Ирыстоны истори баст у Уӕрӕсейы историимӕ, загъта Хуссар Ирыстоны фӕсивӕды ӕхсӕн историкон конкусры дыккаг этапы уӕлахиздзауты хорзӕхджын кӕныны церемонийы рӕстӕджы ХИПУ проректор Тедеты Зӕлинӕ.
Хуссар Ирыстоны паддзахадон университеты актон залы сценӕйыл фараст финалисты — студенттӕ ӕмӕ Цхинвал ӕмӕ районты скъолаты ахуырдзаутӕ — равдыстой экспертон советӕн сӕ докладтӕ. Конкурсы кӕронбӕттӕн этапмӕ ӕрбацыдысты сӕдӕгай кӕсджытӕ, се хсӕн республикӕйы ахуырады министры фыццаг хӕдивӕг Галуанты Элиза ӕмӕ "Россотрудничество"-йы сӕргълӕууӕг Хуссар Ирыстоны Сергей Скворцов.
Конкурсы хайадисджытӕ бацӕттӕ кодтой сӕ ралӕуд ӕртӕ темӕмӕ гӕсгӕ — "История одного российского города", "Россия в истории моего края" и "Листая страницы истории".
Куыстытӕн саргъ кӕныны тыххӕй сарӕзтӕуыд профессионалон историкты экспертон совет.
"Иумӕйагӕй хайадисджытӕ уыдысты 40, ӕмӕ мах бахъуыды кодтам алкӕй куыст дӕр. Жюри лӕмбынӕгӕй аргъ кодта алкӕцы докладӕн дӕр, мах банысан кодтам нӕхицӕн иууыл сӕйрагдӕр пункттӕ", — радзырдта ХИПУ проректор Тедеты Зӕлинӕ.
Финалмӕ ахызтысты ӕртӕйӕ: "Россия в истории моего края" номнацийы фыццаг бынат бацахста Цхинвалы дыууадӕсӕм съколайы ахуырдзау Пухаты Ирэна. Скъоладзау йӕ презентацийы радзырдта Уӕрӕсейы бынаты тыххӕй хӕдбар хуссарирыстойнаг паддзахады арӕзтад ӕмӕ райрӕзты.
"Листая страницы истории" номинацийы лидер ссис гимнази "Рухс"-ы ахуырдзау Тедеты Георгий. Йӕ доклад уыд нывонд фӕстаг уӕрӕсейаг император Николая II-ӕн.
"История одного российского города" номинацийы фыццаг бынат бацахста Колыты Аксойы номыл Паддзахадон аивӕдты лицейы ахуырдзау Плиты Андрей. Йӕ доклады уый равдыста кӕсджытӕн Дзӕуджыхъӕуы истори ӕмӕ йын банысан кодта йӕ статус куыд "Цӕгат Кавказы потенциалон культурон центр".
Ноджы ма кӕсджытӕ сӕхӕдӕг сӕрмагонд грамотӕйӕ рахицӕн кодтой скъоладзау Джиоты Снежанайы.
Конкусры фӕстиуджытӕм гӕсгӕ хайадисджытӕ иууылдӕр райстой уӕлахиздзауы дипломтӕ ӕмӕ зӕрдылдарӕн лӕвӕрттӕ.