ЦХИНВАЛ, 25 дек — Sputnik, Плиты Фатимæ. Хуссар Ирыстоны сæйраг сахары администраци равзардзæн горæты районты рæсугъддæр Наз бæлæстæ æмæ аивдæр ногазон фæлыст дуканитæ. Театралон фæзуаты Ног азы æхсæв фехъусын кæндзысты конкурсы призертæ æмæ уæлахиздзауты нæмттæ, загътой Sputnik Цхинвалы мэрийы пресс-службæйы.
Цхинвалы районты æхсæн рæсугъддæр Наз бæлас сфæлындыны конкурс цæуы рагæй, фæстаг цалдæр аз ма йæм æрбафтыд ноджы иу — дуканиты рæсугъддæр ногазон фæлысты конкурс дæр.
"Горæты администрацийы къамис азилдзæн горæты районтыл ацæугæ азы фæстаг сахатты æмæ саргъ кæндзæн Наз бæлæстæн æмæ дуканиты æддаг бакастæн. Дыууæ конкурсы дæр равзардзысты æртæ хуыздæры æмæ сæ рахицæн кæндзысты призтæй, цыппæрæм хæрзиуджытæ та ратдзысты æнахуыр Наз бæлас æмæ дуканийы æддаг бакасты тыххæй", — загъта уагдоны пресс-секретарь Коцты Зæринæ.
Театралон фæзуаты ногазон мадзалы рæстæджы фехъусын кæндзысты Цхинвалы иууыл аивдæр Наз бæлæсты æмæ дуканиты рæсугъддæр ногазон фæлысты конкурсты хатдзæгтæ.