ЦХИНВАЛ, 28 янв – Sputnik. Цхинвайлаг спорты галуан "Олимп"-ы уагъд ӕрцыдысты ленк кӕнынӕй ерыстӕ "Сыгъзӕрин кӕсаг", хайад сӕ райстой 190 хуссарирыстойнаг ӕвзонг спортсмены. Уый тыххӕй хъусын кӕны РХИ Ленк кӕныны федерацийы президент Евгения Терлеева.
"Ацы ерыстӕ ссисты ног циклы райдайӕн. Уыдон рафӕлгъауынц тыхджындӕр ленкгӕнджыты хицӕн ӕмӕ хицӕн кары къордты, хицӕн дистанциты ӕмӕ ленк кӕныны хицӕн хуызты. Ацы рейтинг у ӕнӕмӕнгхъӕуӕг ӕмбырдгонд командӕ саразынӕн, кӕцы хъахъхъӕндзӕн республикӕйы кад фӕсарӕнты", - радзырдта Терлеева.
Ерысты уӕлахиздзаутӕ ссисты Джиоты Катерина, Буджиты Алим, Тедеты Ирма, Чысиаты Александр, Тедеты Моника, Къӕбулты Инал, Тыджыты Диана, Тасойты Арсен, Къӕбулты Нина, Быценты Арсен, Уалыты Даяна ӕмӕ Уалыты Александр.
Федерацийы президенты ныхӕстӕм гӕсгӕ, хуссарирыстойнаг ленкгӕнджытӕ ӕввахс рӕстӕджы хайад райсдзысты гом турниры Ессентукы, скъолайон ерыстӕ "Дельфины бон" ӕмӕ ӕхсӕнадӕмон ерысты "MadWave Challenge 2019" горӕт Рузайы Мӕскуыйы областы.