ЦХИНВАЛ, 22 фев - Sputnik, Гӕбӕраты Ян. Хуссар Ирыстоны хъахъхъӕнынады министр Гассеты Ибрагим фембӕлд Абхазы хъахъхъӕнынады министрады сӕргълӕууӕг Мераб Кишмарияимӕ, кӕцы ӕрцыд Хуссар Ирыстонмӕ официалон балцы.
Министртӕ фембӕлдысты майрӕмбоны хъахъхъӕнынады министрады территорийыл Цхинвалы. Арфӕйы марш абхазаг делегацийӕн сӕххӕст кодта Аланийы гарзджын тыхты оркестр.
Гассеты Ибрагим банысан кодта, Абхазы хъахъхъӕнынадон уагдоны сӕргълӕууӕджы фыццаг балц Хуссар Ирыстонмӕ кӕй уыдзӕн хӕларадон ахастыты дарддӕры райрӕзты бындур.
"Мах нывӕндӕм райтынг кӕнын нӕ ӕфсӕдты ӕхсӕн бастдзинад. Мӕн уырны, дӕ фыццаг балцы фӕстӕ Хуссар Ирыстонмӕ кӕй ӕрӕвӕрдзыстӕм дарддӕры ахастыты бындур", - загъта Гассеты Ибрагим.
Мераб Кишмария загъта бузныг йӕ коллегӕйӕн ӕмӕ банысан кодта, кӕй у ахсджиаг сфидар кӕнын хъахъхъӕнынад ӕмӕ ӕдасдзинады иумӕйаг тыгъдад.
"Мах цӕттӕ стӕм иумӕ уадзын алыгъуызон мадзӕлттӕ, се хсӕн ӕфсӕддон ахуыртӕ дӕр", - бахахх кодта Мераб Кишмария.
Хъахъхъӕнынадон уагдоны сӕргълӕууӕг хайад райсдзӕн бӕрӕгбонон мадзӕлтты, кӕцытӕ нывонд сты Фыдыбӕстӕ хъахъхъӕнӕджы бонӕн.