ЦХИНВАЛ, 22 фев - Sputnik. Хуссар Ирыстоны президент Бибылты Анатолий радта паддзахадон хорзӕхтӕ 1989-2008 ӕзты хӕстон архайдтыты хайадисджытӕн, хъусын кӕны республикӕйы сӕргълӕууӕджы пресс-службӕ.
Церемонийы рӕстӕджы, кӕцы уыд нывонд Фыдыбӕстӕ хъахъхъӕнӕджы бонӕн, схорзӕхджын кодтой республикӕйы тыхон структурӕты кусджыты, журналистты, депутатты ӕмӕ Хуссар Ирыстоны парламенты аппараты кусджыты.
Паддзахады сӕргълӕууӕг раарфӕ кодта ӕрӕмбырдуӕвджытӕн бӕрӕгбоны цытӕн ӕмӕ сын загъта бузныг сӕ хӕслӕвӕрдтӕ сӕххӕст кӕныны тыххӕй.
"Ирыстон бавзӕрста бирӕ зындзинӕдтӕ, ӕмӕ сымах алыхатт дӕр хъахъхъӕдтат сабырдзинад. Адӕм уый никуы ферох кӕндзысты. Фӕлтӕртӕ, кӕцытӕ хъахъхъӕдтой нӕ республикӕйы хӕдбардзинад 1989-2008 ӕзты, баззайдзысты хъайтартӕй ирон адӕмы историйы. Ирыстоны патриоттӕ сты хъӕбатырдзинады цӕвиттон ӕвзонг фӕлтӕрӕн", - загъта Бибылты Анатолий.
Республикӕйы хъахъхъӕнджытӕн Бибылты Анатолий радта кады грамотатӕ ӕмӕ майдантӕ "Сабырдзинад бахъхъӕнынӕн", "Фыдыбӕстӕйы хъахъхъӕнӕгӕн" ӕмӕ "Хуссар Ирыстоны Фыдыбӕстон хӕсты адӕмы уӕлахизыл 10 азы сӕххӕсты цытӕн".