ЦХИНВАЛ, 20 мар — Sputnik. Хуссар Ирыстоны президент Бибылты Анатолий ӕртыццӕджы бафыста барамынд, цӕмӕй схорзӕхджын кӕной "Кады Орденӕй" мӕлӕты фӕстӕ Колыты Аксойы номыл Паддзахадон аивӕдты Лицейы директоры хӕдивӕг, адӕмон къамисӕг Гӕбӕраты Неллийы. Уый тыххӕй хъусын кӕны паддзахады сӕргълӕууӕджы пресс-службӕ.
"Сӕрмагонд сгуыхтдзинӕдты тыххӕй Республикӕ Хуссар Ирыстоны паддзахад сфидар кӕныны хъуыддаджы, афтӕ ма активон граждайнаг позици ӕмӕ стыр профессионализмы тыххӕй схорзӕхджын кӕнын Кады Орденӕй (мӕлӕты фӕстӕ) Гӕбӕраты Неллийы", - дзырдӕуы хъусинаджы.
Хуссар Ирыстон ӕртыццӕджы фӕстаг хӕрзбон загъта Гӕбӕраты Неллийӕн, кӕцыйы нымайынц адӕмон къамисӕгыл. Гӕбӕраты Нелли ахицӕн йӕ цардӕй 62 азы кары хуыцаубоны.