ЦХИНВАЛ, 2 апр - Sputnik. Хуссарирыстойнаг командӕ бацахста дыккаг бынат Санкт-Петербурджы чемпионаты эстетикон гимнастикӕйӕ, фехъусын кодта Sputnik республикӕйы эстетикон ӕмӕ аивадон гимнастикӕйы президент Цхуырбаты Зема.
Йӕ ныхӕстӕм гӕсгӕ, ӕвзонг гимнасткӕтӕн Хуссар Ирыстонӕй уыд фидар ныхмӕлӕуджытӕ, фӕлӕ чызджытӕн бантыст хорз фӕстиуӕг.
"Нӕ кары къорды архайдтой 19 командӕ. Мах рамбылдта ӕрмӕстдӕр Саратовы командӕ, кӕцыты тренертӕ схъомыл кодтой дунейы чемпионаты призерты", - загъта спортсменкӕты тренер.
Хуссарирыстойнаг командӕйы ралӕуд уыд ӕнтыстджын, банысан кодта Цхуырбаты Зема.
Афтӕ ма тренер загъта бузныг Хуссар Ирыстоны президент Бибылты Анатолийӕн ӕмӕ ӕндӕр гоймӕгтӕн, кӕцытӕ баххуыс кодтой гимнасткӕтӕн транспортимӕ ӕмӕ сын ссардтой цӕрӕнуат Санкт-Петербурджы.
Эстетикон гимнастикӕйы чемпионат "Ӕвзонг гимнаст" цыд Уӕрӕсейы цӕгаттаг столицӕйы 30-31 марты. Уым хайад райстой 6—14 азы кары спортсменкӕтӕ Уӕрӕсейы алыгъуызон горӕттӕй: Апатиты, Белгород, Волгоград, Выборг, Ивангород, Камышин, Лобня, Луга, Саранск, Саратов, Фрязино, афтӕ ма Хуссар Ирыстон ӕмӕ Белорусийӕ.