ЦХИНВАЛ, 18 апр - Sputnik. Хуссар Ирыстоны столицӕ Цхинвал ӕмӕ Керчы ӕхсӕн хӕларады фӕдыл бадзырд бафыстой цыппӕрӕмы Ялтайы ӕхсӕнадӕмон экономикон форумы фӕлгӕтты, хъусын кӕны хуссарирыстойнаг лидеры пресс-службӕ.
Документ бафыстой Цхинвалы администрацийы сӕргълӕууӕг Коцты Алан ӕмӕ Керчы муниципалон зылды сӕргълӕууӕг Николай Гусаков.
Хуссар Ирыстоны делегаци президент Бибылты Анатолийы сӕргълӕудӕй ӕрцыд Хъырыммӕ Ялтайы V ӕхсӕнадӕмон экономикон форумы хайад райсынмӕ ӕртыццӕджы, 17 апрелы. Делегацийы сконды сты республикӕйы хицауады сӕрдары хӕдивӕг Бекъойты Геннадий, ФХМ сӕргълӕууӕг Медойты Дмитрий, Цхинвалы администрацийы сӕргълӕууӕг Коцты Алан ӕмӕ базарадон-сӕудӕджерадон палатӕйы сӕрдар Ӕлборты Алан.
Ялтайы экономикон форум уагъд цӕуы ӕрвылаз 2015 азӕй фӕстӕмӕ. Ацы аз форум уагъд цӕуы 18-20 апрелы. Организатортӕ ӕнхъӕлмӕ кӕсынц ӕртӕ мин хайадисӕгмӕ дунейы 100 бӕстӕйӕ.