ЦХИНВАЛ, 16 май - Sputnik. Хуссар Ирыстоны премьер-министр Пухаты Эрик бахӕс кодта фӕтагъд кӕнын куыстыты темптӕ Стыр парчы, кӕцы ис спортивон комплекс "Олимп"-ы цур Цхинвалы. Уый тыххӕй хицауады сӕрдар фехъусын кодта 2019 азы Инвестпрограммӕйы реализацимӕ хъусдарды штабы радон рабадтыл, хъусын кӕны хицауады пресс-службӕ.
"Инспекцион багӕрсты рӕстӕджы ӕз бацыдтӕн парчы территоримӕ. Фӕнды мӕ банысан кӕнын, арӕзтады темптӕ иттӕг хорз кӕй не сты. Хъӕуы фӕтагъд кӕнын куыстытӕ", - банысан кодта Пухаты Эрик.
Афтӕ ма рабадты рӕстӕджы арӕзтадон организаци "Гарант Групп"-ы директор Александр Березнев радзырдта Хуссар Ирыстоны амӕттаг хъахъхъӕнджыты Мемориалон комплексы арӕзтады тыххӕй Тугъанты Махарбеджы уынгыл.
"Нырма уагъд цӕуынц цӕттӕгӕнӕн куыстытӕ проектон документацимӕ гӕсгӕ", - загъта Александр Березнев.
Объект уыдзӕн 6 метры бӕрзӕнд ӕмӕ 30 метры дӕргъ конструкци. Уымӕй дарддӕр ма компани ӕрӕвналдзӕн объекты раз территорийы хӕрзарӕзтадмӕ. Куыстытӕ нывӕндынц фӕуын ацы аз фӕззӕджы.