ЦХИНВАЛ, 23 май – Sputnik, Козаты Диана. Хуссар Ирыстоны парламент ныры ӕрсидты фӕстаг сессийыл байхъуыста хицауады хыгъдлӕвӕрдмӕ 2018 азы куысты тыххӕй.
Закондӕттӕг органы ӕхсӕзӕм ӕрсидт фӕуд кӕны йӕ куыст. Республикӕйы 9 июны ацӕудзысты парламентон ӕвзӕрстытӕ.
"Хицауады хыгъдлӕвӕрд уагъд цӕуы ӕвзӕрстытӕм цӕттӕкӕнынады рӕстӕджы, ӕмӕ уый бандавдзӕн нӕ ралӕудтыл. Фӕлӕ ӕз алкӕмӕдӕр сидын, цӕмӕй объективон аргъ скӕной", - бадзырдта йӕ коллегӕтӕм парламенты спикер Гасситы Петр.
Йӕ ныхӕстӕм гӕсгӕ, хицауады хыгъдлӕвӕрды анализ равдыста, финансон-экономикон бӕрӕггӕнӕнтӕ кӕй фӕбӕрзонддӕр сты.
"Мах уынӕм, хицауад бирӕ кӕй аразы, цӕмӕй фӕхуыздӕр кӕной цӕрджыты цардуавӕртӕ", - загъта спикер.
Афтӕ ма Гасситы Петр банысан кодта, Инвестпрограммӕ фыццаг хатт кӕй сӕххӕст кодтой сӕдӕ проценты.
Лӕмбынӕгдӕр хицауады куысты тыххӕй 2018 азы радзурдзӕн премьер-министр Пухаты Эрик.
Парламенты рамбадтыл хайад исынц республикӕйы президент ӕмӕ хицауады органты разамонджытӕ.