ЦХИНВАЛ, 28 май – Sputnik. Хуссар Ирыстоны ацы азы инвестпрограммæ æххæст æрцæудзæн æмгъуыдмæ æмæ 100 проценты, фехъусын кодта республикæйы президент Бибылты Анатолий йæ фембæлды Цæгат Кавказы хъуыддæгты фæдыл уæрæсейаг министр Сергей Чеботаревимæ.
Фембæлд уагъд æрцыд Мæскуыйы Бибылты Анатолийы дыууæбонон кусæгон балцы фæлгæтты, хъусын кæны президенты пресс-службæ.
Хъусинагæй куыд бæрæг у, афтæмæй Бибылты Анатолий æмæ Чеботарев æрдзырдтой инвестпрограммæйы реализацийы фæлгæтты æмгуыстадыл.
"Ӕхсæнхицауадон къамисы цы графиктыл æрдзырдтам, уыдон иууылдæр æххæст цæуынц. Фидыр ныфс мæ ис, куыд 2018 азы, афтæ 2019 азы инвестпрограммæ дæр рæстæгыл кæй сæххæст уыдзæн 100 проценты", - загъта президент.
Чеботарев дæр банысан кодта, уæрæсейаг фарсæн тынг ахсджиаг кæй у фехъусын хъуыдытæ æмæ уайдзæфтæ программæйы реализацийы фæдыл.
Афтæ ма уæрæсейаг министр радта бузныджы фыстæг фембæлды хайадисæг, Хуссар Иры æххæстбарджын минæвар Уæрæсейы Гасситы Знауырæн "Цæгат-Кавказаг Федералон зылды райрæзтмæ йæ хайбавæрды тыххæй".