ЦХИНВАЛ, 14 июн — Sputnik, Плиты Фатимæ. Хуссар Иры столицæйы централон уынгтыл фæзындзысты ног æрлæууæнтæ æхсæнадон транспортæн. Ӕфсæн æмæ авгæй конд объекттæ æвæрын райдыдтой Джиоты Аланы проспектæй, æдæппæтæй дзы ацы уынгыл хъуамæ уа аст, фехъусын кодта Sputnik Цхинвалы администрацийы цæрæн-коммуналон хæдзарады хистæр Лалыты Сослан.
Уый банысан кодта, æрлæууæнтæ æхсæнадон транспортæн æвæрд цæуынц президент Бибылты Анатолий хæслæвæрдмæ гæсгæ.
"Цадæггай æмбырд цæуынц æрлæууæнтæ æхсæнадон транспортæн, нырма æвæрæм æфсæн каркас, стæй сæ сæхгæндзыстæм авгæй, сæ бахизæнтæ арæзт цæуыдзысты плиткæйæ, сæвæрдзысты дзы бандæттæ дæр", - загъта Лалыты Сослан.
Уый ма радзырдта, ацы æрллæууæнтæ сты нырыккон домæнтæн дзуаппдæттæг.
Фыццаг æрлæууæнтæ æхсæнадон транспортæн æвæрын райдыдтой столицæйы иунæг проспектæй. Сæ бынæттæ æвзæрст цæуынц Автотранспортон управлени æмæ Паддзахадон автоинспекцийы рекомендацимæ гæсгæ.