ЦХИНВАЛ, 26 июн - Sputnik, Гæбæраты Элина. Хуссар Ирыстоны схорзæхджын кодтой 2019 азы рауагъдонтæ-медалистты. Ӕртыццæджы авд æнтыстджындæр ахуырдзауы райстой сæ хорзæхтæ ахуырады министр Гасситы Наталийы къуыхæй.
Уагдоны разамонæг раарфæ кодта рауагъдонтæн æмæ банысан кодта ныййарджытæ æмæ ахуыргæнджыты стыр хайбавæрд сæ æнтыстджын ахуырмæ.
"Алцыдæр рацыд бирæ бæрцæй уæ ныййарджыты фæрцы, кæцытæ уын бацамыдтой раст фæндаг царды. Стыр бузныг хъæуы зæгъын ахуыргæнджытæн, кæцытæ сæ уæхсджытыл райзæрдæйæ хæссынц амонæджы "бæрн", - загъта Гасситы Натали.
Рауагъдонтæй иуы мад Зæгъойты Алена ныййарджыты номæй бузныг загъта ахуырады министрадæн æмæ раарфæ кодта рауагъдонтæн.
"Уадз æмæ сæ царды алцыдæр рацæуа нывыл æмæ цыфæнды бæрзæндтæм ма схизой, уæддæр сæйраг уой цæсгомджын адæм", - загъта уый.
Ахуырады министрады бæрæггæнæнтæм гæсгæ, 2019 азы Хуссар Иры уыд 509 рауагъдоны, 2018 азы – 435, 2017 азы та 453.