ЦХИНВАЛ, 27 июн — Sputnik. Хуссар Ирыстоны Паддзахадон автоинспекцийы инспектортæ ауагътой профилактикон мадзæлттæ чысыл велосипедисттимæ, кæцыты рæстæджы сын бамбарын кодтой фæндæгтыл æдасдзинады фæткойтæ. Уый тыххæй хъусын кæны республикæйы мидхъуыддæгты министрады пресс-службæ.
Дыууæцалхон транспорты хицæуттæн сæ зæрдыл æрлæууын кодтой, куыд хъæуы хи дарын фæндагыл, фæндагон нысæнтты æмæ хæххыты нысаниуæг, афтæ ма æдасдзинадмæ æнæмæт ахаст цы фæстиуджытæм æркæны, уый.
Хистæр инспектор Хаситы Александры ныхæстæм гæсгæ, сæрды æрбалæудимæ республикæйы уынгты æмæ фæндæгтыл фæфылдæр вæййы велосипедистты нымæц.
"Велосипед хауы тæссаг транспортон фæрæзтæм, сæйраг контингент та сты сабитæ, уымæ гæсгæ, фæфылдæр вæййы сывæллæтты хайадистæй фæндагон-траспортон фыдбылызты тæссагдзинад", - банысан кодта уый.
Инспектортæ ма радзырдтой сабитæн хъахъхъæнæн фæрæзты æнæмæнгхъæуæгдзинады тыххæй.