ЦХИНВАЛ, 5 июл – Sputnik, Козаты Диана. Хуссар Ирыстоны президент Бибылты Анатолий рахицæн кодта Ханты-Мансийскы июны райдайæны уагъд цæуæг æмбæстæгты V-æм æппæтдунейон хъæзтыты æвзонг архайджыты.
Хуссар Иры командæ иттæг хорз равдыста йæхи хъæзтыты, къорды скондмæ бацыдысты ивгъуыд аз æмæ 2019 азы райдайæны хорз бæрæггæнæнтæ ахуыры чи равдыста, уыдон.
Хуссар Иры минæвæрттæ æппæт номинациты дæр уыдысты æнтыстджын, шахматисттæ та райстой сæрмагонд хорзæх "за самую красивую партию" дæр, ныхмæлæууæджы 12 къахдзæфыл рамбулгæйæ.
"Бузныг ацы хатдзæгы тыххæй. Ацы бузныджы ныхæстæ сты аванс, цæмæй сымах уе ʻнтыстыл ма хъæцат æмæ ног бæрзæндтæм тырнат, цы хахх равзæрстат, уым", – загъта президент.
Уый ма бансан кодта, кæстæр фæлтæр абон кæй æвæрынц сæ фидæны бындур.
"Уырны мæ, сымахæн алцыдæр хорз кæй рауайдзæн æмæ мах фидæны æвдисæн уыдзыстæм уæ ног æнтыстытæн", - бафтыдта Бибылты Анатолий.
Президентæй бузныджы гæххæттытæ райстой Шахматты федерацийы разамонæг Саулохты Георгий, уырыссаг æвзаджы ахуыргæнæг Мулдарты Алла æмæ хореограф Тедеты Ацæмæз.