ЦХИНВАЛ, 7 авг – Sputnik, Гӕбӕраты Элина. Адӕмы иудзинад, кӕцыйы руаджы арӕзт цыд Хуссар Ирыстоны паддзахад, баххуыс кодта адӕм бахъахъхъӕнын сӕ фыдыбӕстӕ 2008 азы августы, загъта Цхинвалы пресс-конференцийыл ӕнӕниздзинад хъахъхъӕнынады раздӕры министр, хирург Григорий Кулиджанов.
Хуссар Ирыстоны 7-8 августы ацӕудзысты мысӕн мадзӕлттӕ, кӕцытӕ нывонд сты гуырдзиаг агрессийы 11-ӕм афӕдзы бонӕн. Григорий Кулиджанов радзырдта рынчындоны кусджыты куысты тыххӕй, афтӕ ма хирургтӕ ӕмӕ травмотологты хъайтардзинады тыххӕй, кӕцытӕ ӕнӕхъӕн бон ӕххуыс кодтой фӕцӕвуӕвджытӕн.
"Дохтырты куысты тыххӕй бирӕ загътой, фӕлӕ мӕн фӕнды банысан кӕнын астӕуккаг ӕмӕ кӕстӕр медперсоналы куыст. Тынг зын уыд. Егъау куыст бакодтой хӕдзарадон блокы кусджытӕ дӕр", - радзырдта Григорий Кулиджанов.
Цхинвалы дзулфыцӕн заводы разамонӕг Цхуырбаты Вадим банысан кодта, уыцы бонты адӕм кӕй равдыстой сӕ хъайтардзинад.
"Завод куыннӕ куыстаит, уӕд хормагӕй ничи амардаит. Нӕ коллективы куыст уыд куыд моралон ӕххуыс адӕмӕн. Нӕ ӕмбӕхсӕн бынӕттӕм цыдысты адӕм горӕты кӕрӕттӕй", - радзырдта Цхуырбаты Вадим.
Цхуырбаты Вадим банысан кодта, медицинон кусджыты сгуыхтдзинӕдтӕ уыдысты егъау, фӕлӕ уыцы бонты куыстой зынгфӕдисонтӕ, журналисттӕ ӕмӕ ӕндӕр професситы минӕвӕрттӕ дӕр, кӕцытӕ равдыстой стыр патриотизм.
Уый ӕрымысыд дзулфыцӕн заводы кусӕг Гӕззаты Павелы, кӕцыйы лӕппуйы амардтой хӕсты рӕстӕджы.
"Гӕззаты Павел нӕ ныууагъта йӕ куыст", - загъта дзулфыцӕн комбинаты директор.
Хирург Годжысаты Джино банысан кодта Хуссар Ирыстоны сылгоймӕгты сгуызтдзинӕдтӕ Фондзбонон хӕсты рӕстӕджы.
"Рынчындон ӕмӕ дзулфыцӕн заводы дӕр сӕ хъайтардзинда ӕвдистой нӕ сылгоймӕгтӕ, кӕцытӕ нӕ ныууагътой куысты бынӕттӕ. Уыдонмӕ кӕсгӕйӕ мах дӕр бацыдис ныфс", - банысан кодта дохтыр.
Республикӕйы рынчындоны медицинон персоналы минӕвӕрттӕ дӕр пресс-конференцийы рӕстӕджы радзырдтой сӕ мысинӕгты тыххӕй.