ЦХИНВАЛ, 8 авг – Sputnik, Гӕбӕраты Элина. Хуссар Ирыстоны мысынц 2008 азы августы гуырдзиаг агрессийы амӕттӕгты. Республикӕйы уагъд цӕуынц фыдохы мадзӕлттӕ, кӕцытӕ нывонд сты хӕсты 11-ӕм афӕдзы бонӕн.
Къухдариуӕгады минӕвӕрттӕ ӕмӕ республикӕйы уазджытӕ сӕвӕрдто дидинджытӕ ӕмӕ веноктӕ "Фыдохы бӕласмӕ", кӕцы ис "Сыгъд удты музейы" республикӕйы Цхинвалы районы Тъбеты хъӕуы.
Уым ма Чырыстон дзуары раз ацыд Хуыцаумӕ скуывд.
Гуырдзыстон 2008 азы 8 августы ӕхста Хуссар Ирыстон "Град"-ӕй, Гуырдзыйы ӕфсӕдтӕ ӕрбабырстой республикӕмӕ. Уӕрӕсе, Хуссар Ирыстоны цӕрджыты хъахъхъӕнгӕйӕ, кӕцыты стыр хай райста УФ ӕмбӕстӕггад, бакодта йе 'фсӕдты республикӕмӕ ӕмӕ фондзбонон хӕсты фӕстӕ фӕтардта Гуырдзыстоны ӕфсӕдты. Мӕскуы 2008 азы 26 августы банымадта Хуссар Ирыстон ӕмӕ Абхазы хӕдбардзинад.