Усанеты кувæндонмæ схизгæйæ цæсты раз байгом вæййы æцæг дзæнæттаг ныв - бæрзонд урссæр хæхты астæу хъæдрæбын æрбынат кодта кувæндон, растдæр зæгъгæйæ, йæ пырхæнтæ. Кæддæры егъау систæ æмæ бæстыхæйттæн ма ныр мæгуырау калдæй лæууынц сæ дуртæ.
Рагон таурæгъ куыд амоны, афтæмæй-иу æрвылаз дæр Усанеты дзуары боны æввахс хъæуты цæрджытæ стырæй-чысылæй ссыдысты кувæндоны бынмæ сæхи бафæдзæхсынмæ. Уырдæм-иу йæхи къахæй æрбацыд дзуарæн нывонд саг. Фæсивæд-иу æй акусарт кодтой æмæ иу фæминас кодтой. Иу аз саг æрæгмæ цыд кувæндоны цурмæ, адæм бадтысты æмæ йæм æнхъæлмæ кастысты. Уалынмæ кæддæр-кæддæр саг дæр фæзынд. Уæд æнхъæлмæкæсджытæй иу налат нозтджын нæлгоймаг саджы рацахста æмæ йын ралыг кодта йе 'взаг, зæгъгæ, цæмæ ныффæстиат кодтай. Уæдæй абоны онг нывонд саг никуыуал фæзынд кувæндоны бын. Цхинвалы районы Гром æмæ Гореты хъæуты ацæргæ цæрджытæ фидарæй дзурынц, уый æрымысгæ хабар кæй нæу, зæгъгæ, саг иу æцæгдæр æрцыд Усанеты бынмæ йæ боны.
Хабарæн ма æвдисæнтæй кувæндоны пырхæнты ныр дæр сæ сæрмагонд бынæтты æвæрд сты саджы сыкъатæ.