ЦХИНВАЛ, 16 окт - Sputnik. Хуссар Ирыстоны столицӕйы байгом паддзахадон куыстуат "Югосетнефтепродукт"-ы ӕртаггӕнӕн станц. Ӕртыццӕджы ӕртаггӕнӕн станц бабӕрӕг кодта республикӕйы президент Бибылты Анатолий, фехъусын кодта Sputnik паддзахады сӕргълӕууӕджы пресс-секретарь Гасситы Дина.
Паддзахадон унитарон куыстуаты сӕргълӕууӕг радзырдта президентӕн, "Югосетнефтепродукт"-ы ӕртаггӕнӕн станц у Хуссар Ирыстоны ӕртаджы сӕйраг ӕввонгӕнӕг, куыд сӕрмагонд гоймӕгтӕн, афтӕ паддзахадон уагдӕттӕн дӕр.
"Абоны бон ӕртаггӕнӕн станцы ис АИ-92 маркӕ бензин ӕмӕ дизелон ӕртаг. Афтӕ ма нывӕндӕм ласын АИ-95 маркӕ бензин ӕмӕ саразын ам газ кӕнӕн станц дӕр", - загъта куыстуаты сӕргълӕууӕг.
Президент банысан кодта, фӕстаг рӕстӕджы Паддзахадон унитарон куыстуаты куыст кӕй фӕхуыздӕр ис ӕмӕ хӕссы ӕфтиаг, уый равдыста куыстуаты къухдариуӕгады хорз ахаст йӕ куыстмӕ.
"Сӕйраг фӕстиуӕг у уый, ӕмӕ куыст фӕхуыздӕр, куыстуат райдыдта хӕссын ӕфтиаг. Хорз куыст ма бӕрӕг у уымӕй, ӕмӕ сымах уӕхи фӕрӕзтӕй сарӕзтат ног ӕртаггӕнӕн станц", - загъта Бибылты Анатолий.
Президент бахӕс кодта арӕзтады министр Зӕгъойты Эдуардӕн, цӕмӕй ӕркӕса ӕртаггӕнӕн станцы районы фӕндаг сцалцӕг кӕныны фарстмӕ.
Афтӕ ма ӕрдзырдтой стационарон ӕртаггӕнӕн станцты арӕзтадыл районон центрты.