ЦХИНВАЛ, 24 окт - Sputnik. Хуссар Ирыстоны къуырисӕрӕй фӕстӕмӕ райдыдта республикӕйы цӕрджыты фӕззыгон ӕрсидт ӕфсӕддон службӕмӕ, хъусын кӕны Хъахъхъӕнынады министрады пресс-секретарь Чехойты Инга. Ӕрсидт уагъд цӕуы республикӕйы столицӕ ӕмӕ районты нывӕзтмӕ гӕсгӕ, кӕцы сфидар кодта хъахъхъӕнынады министр, инӕлар-лейтенант Гассеты Ибрагим.
"Ӕрсиддонты фыццаг къордтӕ ныридӕгӕн ацыдысты медицинон басгӕрст. Лӕппутӕн, кӕцытӕ сты нӕбӕззон ӕфсӕддон службӕйӕн низты тыххӕй, лӕвӕрд цӕуы ӕмгъуыд хоскӕнынӕн. Уыдон хъуамӕ ногӕй ацӕуой ӕфсӕддон-дохтырон къамис ӕрдӕг азы фӕстӕ иннӕ ӕрсидты кампанийы рӕстӕджы", - радзырдтой уагдоны пресс-службӕйы.
Медицинон къамис рацӕуыны фӕстӕ ӕрсиддонтӕ рацӕуынц райдайӕн ӕфсӕддон цӕттӕкӕнынады курс Хъахъхъӕнынады министрады ахуырадон центры. Иу мӕйы фӕстӕ ӕрсиддонтӕ ӕфсӕддон ард бахӕрдзысты ӕмӕ сӕ арвитдзысты ахуырадон ротӕмӕ дарддӕры службӕ рацӕуыны тыххӕй.
Ӕфсӕддон комиссариаттӕ ӕфсӕддон службӕмӕ ӕрбаздахынц 18-27 азы кары республикӕйы ӕмбӕстӕгты. Ӕрсиддонтӕ, кӕцытӕ не рбацыдысты ӕфсӕддон комиссариатмӕ ӕнӕ айсинаг ӕфсонӕй, ӕрбаздахдзысты административон ӕмӕ уголовон бӕрнмӕ.
Хуссар Ирыстоны Гарзджын тыхты службӕйы ӕмгъуыд у иу аз.