ЦХИНВАЛ, 21 ноя - Sputnik, Годжысаты Анна. Хуссар Ирыстоны Уӕлвӕткон уавӕрты министрад (УУМ) ӕрсидт хӕдтулгӕты шофыртӕм, цӕмӕй раивой сӕрдыгон резинӕ зымӕгонмӕ.
Уагдоны бӕрӕггӕнӕнтӕм гӕсгӕ, мӕйы райдайӕны Дзау-Рукъ фӕндагыл авариты фылдӕр хай ӕрцыд фыццаг митуарды тыххӕй – шофыртӕ нӕ сырӕхстысты скъӕрын бырынцъаг фӕндагыл.
УУМ пресс-секретарь Тедеты Роза куыд фехъусын кодта Sputnik, афтӕмӕй автомагистралыл нырма уыдзӕн хорз боныгъӕд, фӕлӕ ӕнамонд цаутӕ ма руадзыны тыххӕй резинӕ ныридӕгӕн хъӕуы раивын.
"Фыццаг митимӕ трассӕйыл уыд цаутӕ, шофыртӕ куы бадзырдтой ирвӕзынгӕнджыты ӕххуысмӕ, уымӕн ӕмӕ сӕрдыгон резинӕйыл скъӕрын сӕ бон нӕ уыд", - загъта Тедеты Роза.
Амӕйразмӕ шофыртӕм ӕрсидт республикӕйы Паддзахадон автоинспекци дӕр.