ЦХИНВАЛ, 29 ноя - Sputnik. Хуссарирыстойнаг спортсмен Зассеты Арсӕмӕг рамбылдта сыгъзӕрин майдан Олимпиаг хъӕзтыты дыууӕ хатты чемпион Андиаты Сосланы мысӕнӕн Ӕппӕтуӕрӕсейон турнир уӕгъдибар хъӕбысхӕстӕй. Уый тыххӕй хъусын кӕны фӕсивӕдон политикӕ, спорт ӕмӕ туризмы комитеты пресс-службӕ.
Коцты Тамерланы хъомылгӕнинаг архайдта 97 кг уӕзы категорийы. Фыццаг фембӕлды Арсӕмӕг фӕуӕлахиз Плиты Азӕмӕтыл, уый фӕстӕ та разынд тыхджындӕр дагейстайнаг Абдул Магомедовӕй. Ӕрдӕгфиналы цхинвайлаг спортсмен рамбылдта Адыгейы минӕвар – Азрет Шогеновы.
Финалон тохы Зассеты Арсӕмӕг фембӕлд ӕндӕр ирон хъӕбысӕйхӕцӕг Дудайты Сосланбегимӕ, кӕцыйы рамбылдта 4:2 хыгъдӕй.
Ерыстӕ уагъд цӕуынц Дзӕуджыхъӕуы 28-29 ноябры.
Амӕйразмӕ цхинвайлаг скъолайы хъомылгӕнинаг Зассеты Арсӕмӕг рамбылдта сыгъзӕрин майдантӕ Уӕрӕсе ӕмӕ дунейы чемпионаты.