ЦХИНВАЛ, 12 мар – Sputnik, Плиты Фатимæ. Хуссар Ирыстоны Ленингоры районы бæрæг кæнынц, куыд цæуы коронавирусы ныхмæ профилактикон куыст. Районы цалдæр хъæуы скъолатæ æмæ уагдæттæ басгæрстой администрацийы кусджытæ æмæ районы рынчындоны сæйраг дохтыр, фехъусын кодта администрацийы кусæг Гæбæраты Сослан.
"Басгæрстам, коронавирусæй бахизынæн цы мадзæлттæ ист цæуынц, уый. Балцы немæ уыд районы рынчындоны сæйраг дохтыр Гобозты Зураб. Федтам ахуырадон уагдæттæ æмæ хъæууон администрацитæ. Байуæрстам рекомендацитимæ гæххæттытæ", - загъта Гæбæраты Сослан.
Уый ма радзырдта, ахæм балцытæ кæй сараздзысты районы аннæ цæрæн пункттæм дæр.
Хуссар Ирыстон сæвæрдта тобæ 60-йæ фылдæр бæстæйы æмбæстæгтæн республикæйы территоримæ æрбахизыныл короновирусы ног хуызы апарахат ма руадзыны тыххæй. Вирусæй бахизыны охыл Хуссар Ир сæхгæдта йæ арæн Гуырдзыстонимæ.