ЦХИНВАЛ, 17 мар – Sputnik, Козаты Диана. Транскавказаг магистралыл автотранспорты змӕлдыл тобӕ сӕвӕрдтой дыццӕджы райсомӕй сӕрмагонд барамынды онг, фехъусын кодтой Хуссар Ирыстоны Уӕлвӕткон уавӕрты министрады (УУМ) пресс-службӕйы.
Хуссар Ирыстонмӕ ӕрыздӕхт зымӕг. Республикӕйы къуырисӕры ӕхсӕв ӕруарыд мит. Мит уары ныры онг дӕр. Синоптикты бӕрӕггӕнӕнтӕм гӕсгӕ, ахӕм боныгъӕд уыдзӕн дыууӕ-ӕртӕ боны дӕргъы.
"9.30 сахатӕй фӕстӕмӕ тобӕ сӕвӕрдтой Транскамы змӕлдыл, уымӕн ӕмӕ нӕй фадат сӕххӕст кӕнын ӕдасдзинад фӕндагыл. Фӕндаг ӕхгӕд уыдзӕн сӕрмагонд барамынды онг", - банысан кодтой УУМ.
Уагдоны бафтыдтой, зӕгъгӕ, хӕхты ис тыхджын митуард ӕмӕ зӕйты ӕрцыдӕй тас.