ЦХИНВАЛ, 15 апр – Sputnik. Цӕгат Ирыстоны таможнӕйы кусджытӕ ӕрурӕдтой хӕдтулгӕ 198 радиактивон компасимӕ "Дӕллаг Зӕрӕмӕджы" постыл. Базайрӕгтӕ ссардтой транспортон фӕрӕзы басгӕрсты рӕстӕджы, хӕдтулгӕйыл скъӕрдта Хуссар Ирыстоны ӕмбӕстаг. Нӕлгоймаг раскъӕрдта Уӕрӕсейы территорийӕ ӕмӕ ницы фехъусын кодта йӕ базайрӕгты тыххӕй, хъусын кӕны Цӕгат Кавказы таможнӕйон хайады пресс-службӕ.
"Таможнӕйон басгӕрсты рӕстӕджы хӕдтулгӕйы ссардтой сау пакет, кӕцыйы уыдысты 198 ӕфсӕддон компасы", - дзырдӕуы хъусинаджы.
Экспертизӕйы хатдзӕгтӕм гӕсгӕ, компастӕ сты тӕссаг адӕймагӕн, уымӕн ӕмӕ сӕ ис радиактивон буарад. Цауы фӕдыл бакодтой уголовон хъуыддаг.