ЦХИНВАЛ, 7 май — Sputnik, Плиты Фатимæ. Хуссар Ирыстоны столицӕйы сӕвӕрдтой цырт Стыр Фыдыбӕстон хӕсты хъайтар Хъоцыты Константинӕн. Денджызы кавалерийы легендарон командирӕн бюст фӕзынд Цхинвалы дыккӕгӕм скъолайы кӕрты, кӕцы хӕссы йӕ ном.
Цырт официалон ӕгъдауӕй нырма конд не рцыд.
Ацы бюст ссис ӕртыккаг цырт номдзыд хӕстонӕн Хуссар Ирыстоны. Нырмӕ Хъоцыты Константины ном сӕнусон кодтой столицӕйы Кады Аллейы, уый фӕстӕ та Дзауы районы йӕ райгуырӕн хъӕу Тъонтъобеты.
Хъоцыты Константины хӕстон операциты нымӕц у 256. Стыр Фыдыбӕстон хӕсты рӕстӕджы уыд денджызон кавалерийы командир, Советон цӕдисы хъайтары ном райста 16 майы 1944 азы. Йӕ хорзӕхты нымӕцы ма ис Ленины орден, Сырх Тырысайы ордентӕ, "Золотая Звезда" ӕмӕ ӕндӕртӕ.
Хъоцыты Константин йӕ цардӕй ахицӕн 1946 азы октябры.