ЦХИНВАЛ, 27 июл - Sputnik. Цхинвалы хуыцаубоны ацыд Цхинвалы районы гом турнир футболӕй республикӕйы физикон культурӕйы сгуыхт кусӕг Габайты Иваны номарынӕн. Уый уыд фыццаг футболон мадзал, кӕцы ацыд Хуссар Ирыстоны карантинон мадзӕлттӕ сисыны фӕстӕ.
Фӕсивӕдон политикӕ ӕмӕ спорты фӕдыл комитеты пресс-службӕ куыд хъусын кӕны, афтӕмӕй сӕйраг призыл тох кодтой Цхинвалы, Знауыры, Дзауы ӕмӕ Ленингоры районты командӕтӕ.
"Фыццаг хъазты Цхинвалы ӕмӕ Знауыры районты хсӕн сӕйраг рӕстӕг нӕ рабӕрӕг кодта уӕлахиздзауы ӕмӕ фембӕлд балхынцъ ис пенальтитӕй. Ӕнтыстджындӕр разындысты Знауыры районы минӕвӕрттӕ", - банысан кодтой комитеты.
Дыккаг хъазты фембӕлдысты Дзауы ӕмӕ Ленингоры районты футболисттӕ, пенальтиты фӕстиуджытӕм гӕсгӕ финалмӕ ахызт Дзауы районы командӕ. Финалы рамбылдтой Знауыры районы футболисттӕ – командӕ ссис турниры сӕйраг призы хицау.
Хуссар Ирыстоны марты кӕрӕтты тобӕ сӕвӕрдтой культурон-массон ӕмӕ спортивон мадзӕлттӕ уадзыныл. Арӕнӕвӕрдон мадзӕлттӕ райдыдтой исын майы райдайӕны.