ЦХИНВАЛ, 4 авг — Sputnik, Плиты Фатимæ. Хуссар Ирыстоны Урс Туалгоммæ фæуд кæны дыууæ хиды арæзтад. Куыстытæ фæуыдзысты сентябры, фехъусын кодта Sputnik арæзтадон æрмæджыты заводы кусæг Джыгкайты Нарт.
Ног хидтæ арæзт цæуынц Рукъ-Ерманы фæндагыл цæугæдæттæ Рукъдон æмæ Леуахийы сæртыл, ацы арæзтадæй фæхуыздæр кæндзысты инфраструктурæ коммæ - фæстаг æзты ам фæзынд донуадзæн завод æмæ донхосгæнæндон.
"Хидтæм арæзт цæуынц сæ бахизæнтæ, æппæт куыстытæ дæр хъуамæ фæуæм ацы азы сентябрьмæ" - загъта Джыгкайты Нарт.
Арæзтад цæуы экономикон райрæзты министрады заказмæ гæсгæ, егъау донрауагъдадон заводмæ инфраструктурæ срæвдз кæныны нысанæн. Фыццаджы дæргъ, кæцы цæуы Рукъдоны сæртыл, у 22 метры, дыккаг цæуы Леуахийы сæртыл, у 44 метры", - банысан кодта Нарт.
Куыстытæ райдыдтой ивгъуыд аз октябры. Фæндаг, кæцыйыл арæзт цæуынц хидтæ, кæны Згъубир, Сба, Брытъат, Едыс æмæ Ерманы хъæутæм.