ЦХИНВАЛ, 26 янв — Sputnik, Гӕбӕраты Элина. Хуссар Ирыстоны хӕххон районты тыхджын митуарды фӕстиуӕгӕн кӕцыдӕр цӕрӕг пунктты ахицӕн рухс ӕмӕ фӕзынд проблемӕтӕ мобилон бастдзинадимӕ.
"Мегафон-Хуссар Ирыстоны" (Остелеком) специалист ӕхсӕнадон бастдзинӕдты фӕдыл Бежанты Зӕринӕ куыд фехъусын кодта, афтӕмӕй техникон специалисттӕ басгӕрстой Къуыдаргомы базон станцтӕ ӕмӕ дзы баластой ӕртаджы фӕстауӕрц.
"Фидарӕй нӕ бон у зӕгъын, электроэнерги кӕй нӕ уыд, уый тыххӕй мобилон бастдзинады гъӕд кӕй нӕ февзӕрдӕр, ӕмӕ Дзауы районы цӕрджытӕн сӕ бон у дарддӕр пайда кӕнын бастдзинады лӕггӕдтӕй хуымӕтӕг режимы", - хъусын кӕны Бежанты Зӕринӕ.
Уый бафтыдта, компанийӕн кӕй ис 70 базон станцы, кӕцыты хай ис республикӕйы хӕххон районты.
"Хӕххон рельеф зымӕгон периоды къуыхцы кӕны базон станцты куысты басгӕрст. Ацы хатт сӕйраг зындзинӕдтӕ фӕзындысты базон станцмӕ ӕртаг баласынимӕ. Республикӕйы бастдзинады комитеты разамынадимӕ ӕмархайды руаджы мах рӕстӕгыл ӕрбаластам ӕртаг", - банысан кодта уый.
Компанийы баныфсӕвӕрдтой, специалисттӕ кӕй ӕмбарынц, куыд ахсджиаг у мобилон бастдзинад ӕмӕ уый фӕдыл алцыдӕр аразынц, цӕмӕй мобилон бастдзинад куса цыфӕнды боныгъӕды рӕстӕджы дӕр.