ЦХИНВАЛ, 29 янв - Sputnik, Плиты Фатимӕ. Хуссар Ирыстоны дӕсны ӕвзонг ленкгӕнӕг Тыджыты Диана хайад райсдзӕн ӕппӕтуӕрӕсейон ерысты. Дыууадӕсаздзыд чызг ерысты уыдзӕн иунӕг спортсменкӕ республикӕйӕ, фехъусын кодта Sputnik Федерацийы хистӕр Евгения Терлеева.
"Казаны ерыстӕ кӕстӕр кары спортсменты хсӕн цӕуыдзысты ӕртӕ дистанцийӕ. 800 метр сӕрибар стилӕй, 200 - комплексон ӕмӕ 100 метр та равзаргӕ стилӕй. Диана старт кӕндзӕн батерфляййӕ", - загъта тренер.
Йӕ ныхӕстӕм гӕсгӕ, ӕрыгон чызг ерыстӕм балцӕг райста ивгъуыд аз йӕ ралӕудты.
"Ерысты архайӕг суӕвӕн ис ӕвзӕрст рацӕугӕйӕ, мах стӕм Цӕгат Ирыстоны командӕйы сконды. Ныфс нӕ ис, хорз кӕй равдисдзӕн йӕхи. Ӕвзӕрст рацыд фарон марты ӕмӕ уӕдӕй фӕстӕмӕ йӕ цӕттӕдзинады ӕмвӕзад зынгӕ фӕхуыздӕр ис", - бафтыдта Евгения Терлеева.
Тыджыты Дианайы ӕнтыстыты хсӕн рахицӕн кӕнӕн ис йӕ уӕлахиз 2020 азы февралы ӕппӕтуӕрӕсеон ерыстӕ "Mad Wave Classic"-ы 200 метры дистанцийы. Уый у Хуссар Ирыстоны ленкгӕнджыты тыхджындӕртӕй иу.