ЦХИНВАЛ, 4 фев – Sputnik, Плиты Фатимӕ. Цхинвалы Остъаты Алексейы уынгыл уӕвӕг сабидоны кӕстӕр кары къорды сӕхгӕдтой карз респираторон вирусон инфекцийы апарахаты аххосӕй 15 февралы онг. Уый тыххӕй Sputnik фехъусын кодта горӕты ахуырады хайады хистӕр Сиукъаты Ольга.
Ахуырадон ӕмӕ скъолайы агъоммӕ уагдӕтты карантин конд цӕуы контингентӕн йӕ 20% фылдӕр куы фӕрынчын уой, уӕд.
"17-ӕм сабидоны гриппы аххосӕй сӕхгӕдтой иу кӕстӕр къорд. Санитарон цӕстдарды службӕ йӕ хъус дары уавӕрмӕ ӕмӕ уый фӕстӕ дӕтты рекомендацитӕ", - загъта хайады гӕс.
Ивгъуыд къуырийы кæрон ма Цхинвалы скъолаты ӕртӕ къласы сӕхгӕдтой карантиныл коронавирусӕй рынчынты кӕй сбӕрӕг кодтой, уый тыххӕй. Тобæтæ бакодтой дыккӕгӕм скъолайы, Аивæдты лицей æмæ гимнази "Альбион"-ы.