ЦХИНВАЛ, 9 фев — Sputnik, Гӕбӕраты Элина. Хуссар Ирыстоны паддзахадон университеты (ХИПУ) музейон комплекс баххӕст кодтой ног экпонаттӕй, кӕцытӕ сын радта Цхинвалы цӕрӕг Козаты Нодар (Кемпес). Уый тыххӕй хъусын кӕны университеты пресс-службӕ.
Sputnik ныхасӕмбал куыд фехъусын кодта, афтӕмӕй горӕты цӕрӕг радта ХИПУ-йӕн 19-ӕм ӕнусы ӕвзист сахат, Уӕрӕсейы 18-19 ӕнусты аст ӕвзист ӕмӕ иу ӕрхуы монетӕйы. Афтӕ ма музейӕн радтой хӕдтулгӕты коллекци – 13 бӕрзонд гъӕдджын макеты, кӕцытӕ рауагътой Бангладешы "Легендарные советские автомобили" серийӕ, афтӕ ма 80 минералӕй фылдӕр.
"Козаты Нодар у зындгонд гоймаг, республикӕйы патриот, йӕ хъуыддаджы профессионал. Стыр бузныг Козаты Нодарӕн, афтӕ ма Хуссар Ирыстоны ӕмбӕстӕгтӕн, кӕцытӕ радтой ХИПУ музеймӕ экспонаттӕ. Козаты Нодар йӕхӕдӕг банхъардта махӕн экспонаттӕ куы базыдта музей кӕй кӕнӕм, уӕд", - банысан кодта ХИПУ ректор Тедеты Вадим.
Фарон декабры музей баххӕст кодтой экспонаттӕй,кӕцытӕ сын радтой Цхинвалы цӕрджытӕ, сӕ нымӕцы кард ӕмӕ ӕвзонг нывгӕнӕг Джиоты Магрезы куыстытӕ. Афтӕ ма бирӕ номдзыд историктӕ, археологтӕ ӕмӕ этнографтӕ балӕвар кодтой музейӕн алыгъуызон цардуагон дзауматӕ, хӕцӕнгарз ӕмӕ ӕндӕр хӕзнатӕ.
Хуссар Ирыстоны паддзахадон университеты этографи ӕмӕ бӕстӕзонады музей байгом кодтой 4 декабры. Уым ӕрӕмбырд кодтой археологи, истори ӕмӕ этографийы экспонаттӕ.