Хуссар Иры ӕфсӕддонтӕ райдыдтой цӕттӕ кӕнын Уӕлахихизы боны цытӕн парадмӕ

ЦХИНВАЛ, 21 апр — Sputnik. Хуссар Ирыстоны Хъахъхъӕнынады министрады ӕфсӕддонтӕ райдыдтой цӕттӕ кӕнын ӕфсӕддон парадмӕ, кӕцы нывонд у Стыр Фыдыбӕстон хӕсты уӕлахизы 76-ӕм афӕдзы бонӕн. Уый тыххӕй хъусын кӕны хъахъхъӕнынадон уагдоны пресс-службӕ.

Уӕлахизы парад ацӕудзӕн 9 майы Цхинвалы сӕйраг фӕзуатыл. Уым хайад райсдзысты 750 адӕймагӕй фылдӕр ӕмӕ ӕфсӕддон техникӕйы 50 иуӕджы – Хъахъхъӕнынады министрад, МХМ, УУМ, ПӔК Арӕнгӕрон службӕ, Юстицийы министрад, Уӕрӕсейы Федерацийы 4-ӕм ӕфсӕддон базӕ ӕмӕ Уӕрӕсейы Федералон ӕдасдзинады службӕйы Арӕнгӕрон хайады къордтӕ.

"Дӕлхайӕдты тренировкӕтӕ уагъд цӕуынц Хъахъхъӕнынады министрады ӕфсӕддон горӕты плацыл. Ахуырты хайад исынц РХИ Хъахъхъӕнынады министрад ӕмӕ 4-ӕм Ӕфсӕддон базӕйы оркестр", - дзырдӕуы хъусинаджы.

Уагдоны бафтыдтой, зӕгъгӕ, Уӕлахизы парады генералон репетицитӕ ацӕудзысты 4-7 майы Цхинвалы Театралон фӕзуатыл ӕфсӕддон техникӕйы хайадистӕй.