ЦХИНВАЛ, 22 апр – Sputnik, Козаты Диана. Хуссар Ирыстоны 2020 азы гуырынад фӕфылдӕр мӕлынады бӕрӕггӕнӕнтӕй, загъта Sputnik пресс-конференцийы рӕстӕджы Паддзахадон статистикӕйы хайады сӕргълӕууӕг Тыбылты Инал.
"Мӕхицӕн дӕр уый уыд тынг ӕхсызгон. Пандемийы уавӕрты мах нӕ ӕнхъӕлдтам, ахӕм рӕзт кӕй уыдзӕн демографийы", - загъта Тыбылты Инал.
Статистикӕйы хайады хистӕры ныхӕстӕм гӕсгӕ, ӕрвыл аз бӕрӕггӕнӕнтӕ фылдӕр хатт вӕййынц ӕмхуызон, ӕмӕ афтӕ у бирӕ ӕзты дӕргъы.
"Фӕлӕ 2020 азы афтӕ рацыд, ӕмӕ махмӕ 73 адӕймаджы фылдӕр райгуырд фӕмардуӕвджытӕй. Уый бирӕ нӕу, фӕлӕ нын фадат дӕтты оптимизмимӕ кӕсын фидӕнмӕ. Ивгъуыд азты цы уавӕр уыд, уымӕ гӕсгӕ плюс 73 у хорз хатдзӕг", - бафтыдта Тыбылты Инал.
Республикӕйы 2019 азы фӕмардуӕвджыты нымӕц уыд 507 адӕймаджы, ацы период райгуырд 496 сабийы.