ЦХИНВАЛ, 25 май — Sputnik, Плиты Фатимӕ. Хуссар Ирыстоны архайгӕ чемпион Сиукъаты Алан бацахста дыккаг бынат Дзӕуджыхъӕуы чемпионаты классикон шахматтӕй. 14 азы кары онг фӕсивӕды хсӕн та фыццаг ссис аннӕ цхинвайлаг минӕвар Бибылты Алан, фехъусын кодта Sputnik шахматты Федерацийы разамонӕг Саулохты Георгий.
"Иумӕйаг хыгъды ӕнтыстджын уыд Сиукъаты Алан, уый у Хуссар Ирыстоны турнирты ӕдзухон лидер, республикӕйы архайгӕ чемпион. Ныр та ссис Дзӕуджыхъӕуы ӕвзист призер. Хицӕн кары къорды ерыс кодтой 14 азы кары онг фӕсивӕд, ам та рамбылдта нӕ аннӕ минӕвар Бибылты Алан",- загъта Саулохты Георгий.
Хуссар Ирыстоны шахматты Федерацийы бындур ӕвӕрд ӕрцыд 2016 азы. Уӕдӕй нырмӕ спорты ацы хуыз зынгӕ райтынг - фӕзынд шахматты секцитӕ, фӕсивӕд сӕ хъусдард аздӕхтой ацы хъазтмӕ.