ЦХИНВАЛ, 25 май — Sputnik, Плиты Фатимӕ. Хуссар Ирыстоны столицӕйы дыццӕджы ӕхсӕв ӕрцыд зӕххӕнкъуыст. Уӕлвӕткон уавӕрты министрады информацимӕ гӕсгӕ, республикӕйы зианбаййафджытӕ ӕмӕ пырхытӕ нӕй.
Зӕххӕнкъуыст ӕрцыд дыццӕджы ӕхсӕв 00:43 сахатыл, бирӕуӕладзыгон хӕдзӕртты цӕрджытӕй бирӕтӕ райхъал сты ӕнкъуыстытӕй.
"Цӕгат Ирыстоны коллегӕты бӕрӕггӕнӕнтӕм гӕсгӕ, зӕххӕнкъуысты эпицентр уыд Гуырдзыстоны 15 километры арфӕн зӕххы бын, йӕ тых уыд 4,4 баллы", - загътой уӕлвӕткон уавӕрты министрады пресс-службӕйы.
Хуссар Ирыстоны Къуыдаргомы район, кӕцы нымад цӕуы сейсмологон ӕгъдауӕй тӕссаг бынатыл, зӕххӕнкъуыст нӕ рахатыдысты, загъта Sputnik горӕт Къуайсайы мэр Бӕззаты Геннадий.
Зӕххӕнкъуыст рахатыдысты Цӕгат Ирыстоны кӕцыдӕр районты дӕр.