Цы дӕсниӕдтӕм исынц Цхинвалы колледжы ӕмӕ кӕд хъӕуы бахӕссын документтӕ

Ацы аз исӕн къамис кусдзӕн ӕрмӕстдӕр иу мӕй – 1 июлӕй 1 августмӕ. Абитуриенттӕн фадат уыдзӕн бацӕуын ахуыры 13 здӕхтмӕ
Sputnik

ЦХИНВАЛ, 16 июн – Sputnik, Тъехты Дзерассӕ. Цхинвалы бирӕпрофилон колледжы исӕн къамис райдайдзӕн йӕ куыст 1 июлӕй, радзырдта Sputnik ахуырадон уагдоны директор Козаты Лира. Йӕ ныхӕстӕм гӕсгӕ, ацы аз документтӕ исдзысты ӕрмӕстдӕр иу мӕй – 1 августмӕ (уый размӕ къамис куыста дыууӕ мӕйы).

"Ӕмбӕстӕгтӕ райдайынц хӕссын документтӕ 15 июлӕй фӕстӕмӕ. Иннӕ рӕстӕг къамисӕн куыст нӕ вӕййы", - банысан кодта Козаты Лира.

Уый бафтыдта, зӕгъгӕ, ӕввахс рӕстӕджы республикӕйы ДИФ-ты ныммыхуыр кӕндзысты колледжы дӕсниӕдты ӕмӕ бацӕуӕнынӕн ӕнӕмӕнгхъӕугӕ документты номхыгъдтӕ.

Цхинвалы бирӕпрофилон колледжы дӕргъвӕтин паузӕйы фӕстӕ райдыдтой практикон ахуыртӕ

Козаты Лирайы ныхӕстӕм гӕсгӕ, колледжы къухдариуӕгад ӕрӕджы бадӕтта экспертизӕмӕ Хуссар Ирыстоны ахуырады министрадмӕ ног уагӕвӕрд, кӕцымӕ гӕсгӕ студентты исдзысты ӕнӕ фӕлварӕнтӕй аттестаты астӕуккаг балл хынцгӕйӕ. Экспертизӕйы хатдзӕгтӕ бӕрӕг уыдзысты цалдӕр бонмӕ.

Уый банысан кодта, хъыгагӕн, кӕцыдӕр дӕсниӕдтӕм бирӕ адӕм нӕ цӕуынц. Уыдонӕй сӕ иу у агрономи. Кӕд абитуриент фӕвӕййы 9 класс, уӕд ацы дӕсниадыл ахуыр кӕнынц 2 азы, 11-ӕм классы фӕстӕ та ахуыр кӕнынц 10 мӕйы.

Директор бахахх кодта, дыууӕ азы кӕй уагъта фембӕлдтӕ районы администрацитимӕ ацы здӕхты популяризацийӕн. Ӕрӕджы ацыд фембӕлд хъӕууон хӕдзарады министримӕ дӕр, ӕмӕ ма ноджы иу та нывӕндынц ауадзын.