ЦХИНВАЛ, 22 июн — Sputnik, Плиты Фатимӕ. Хуссар Ирыстоны столицӕйы уынгтыл баннертыл бакодтой Стыр Фыдыбӕстон хӕсты архайджыты хуызисттӕ. Республикӕйы культурӕйы министрады пресс-службӕйы куыд фехъусын кодтой Sputnik, афтӕмӕй баннертыл ис 700 къамы, кӕцыты бавдыста Ӕнӕмӕлгӕ полкы штаб.
"Стыр Фыдыбӕстон хӕсты райдайӕныл 80 азы сӕххӕсты цытӕн Цхинвал сфӕлыстой тематикон ӕгъдауӕй - баннертыл фӕзынд уыцы ӕгъатыр хӕсты архайджыты хуызисттӕ", - загъта пресс-службӕйы кусӕг Остъаты Мӕдинӕ.
Уый ма бафтыдта, Ӕнӕмӕлгӕ полкы штабы куыст дарддӕр дӕр кӕй цӕуы активонӕй - Стыр Фыдыбӕстон хӕстмӕ Хуссар Ирыстонӕй ацыд мингай хӕстонтӕ, уыдон фӕдыл ӕмбырд цӕуы информаци.
"Ӕнӕмӕлгӕ полкы" базӕйы цы хуызисттӕ уыд Стыр Фыдыбӕстон хӕсты архайджытӕн, уыдон ма Мысӕн датӕйы фӕлгӕтты хицӕн номырӕй рацыдысты газет "Республикӕ"-йы дӕр.